۸صبح، کابل: په ایران او پاکستان کې مېشتو ۱۲۰ افغانو ښځو د فرانسې له ولسمشر امانویل مکرون څخه غوښتي چې د بشري ویزو ونډه زیاته او د هغوی د پناهغوښتنې دوسیو ته د پاملرنې بهیر چټک کړي.
دغو ښځو دوشنبه د لړم پر ۲۵مه په یو لیک کې ویلي چې اوس افغانستان ته په جبر د بېرته ستنولو له ګواښ سره مخ دي او د پخوانیو فعالیتونو له امله یې هېواد ته بېرته ستنېدل ژوند ته ګواښ پېښولی شي.
په دغو ښځو کې د بشري حقونو فعالانې، خبریالانې، قاضیانې، د پوهنتون استادانې او پخوانۍ ښځینه افسرانې دي.
هغوی ویلي چې دا لیک یې د نږدې ۶۰۰ فرانسوي او نړیوالو وګړو په ملاتړ د فرانسې ولسمشر ته لېږلی دی.
د لیک لاسلیکونکو له مکرون څخه غوښتي چې د فرانسې د بهرنیو چارو او کورنیو چارو وزارتونو په همکارۍ، د افغان پناهغوښتونکو د منلو ظرفیت زیات او د هغوی د دوسیو د ارزونې بهیر ته لومړیتوب ورکړي.
هغوی د بشري ویزو د ونډې د زیاتوالي او په اسلاماباد او تهران کې د فرانسې له سفارتونو سره د همکارۍ غوښتنه کړې، څو یې غوښتنلیکونو ته د پاملرنې بهیر چټک شي.
دغو ښځو ویلي چې د غوښتنې یوه کاپي یې د فرانسې لومړۍ مېرمنې، د دغه هېواد د بهرنیو چارو وزارت، د ملي شورا استازو او سناتورانو ته هم لېږلې ده.






