۸صبح، کابل: د ملګرو ملتونو د بشردوستانه مرستو د همغږۍ دفتر (اوچا) اعلان کړی چې د روان کال له جنورۍ میاشتې تر سپټمبر پورې په افغانستان کې ۹.۹ میلیونو کسانو لږ تر لږه یو ډول بشردوستانه مرسته ترلاسه کړې ده.
اوچا دوشنبه د لړم پر ۲۵مه راپور ورکړی چې د مرستو د ترلاسه کوونکو له ډلې ۵.۱ میلیونو د خوړو او کرنې په برخه کې، ۴.۵ میلیونو روغتیايي خدمات او ۳.۵ میلیونو نورې مرستې ترلاسه کړې دي.
د راپور له مخې، تر سپټمبر میاشتې په افغانستان کې د بشري مرستو د رسولو لپاره ۵۳۷ میلیونه ډالره نوې مالي مرستې اعلان شوې چې د اړتیا وړ بودیجې یوازې ۳۱ سلنه جوړوي.
د اوچا په خبره، لا هم د ۱.۷۱ میلیاردو ډالرو اړتیا وړ بودیجې ۱.۱۸ میلیارد ډالره (۶۹ سلنه) نه دي برابر شوي.
اوچا ټینګار کړی چې د مالي سرچینو د محدودیتونو له امله، بشردوستانه مرستندوی شریکان هڅه کوي چې مرستې د لا همغږو او لږ لګښت لرونکو لارو چارو له مخې وړاندې کړي.






