د خبریالانو نړیوال فدراسیون (IFJ) ۲۰۲۴ زېږدیز کال د خبریالانو لپاره تر ټولو خونړی کال بللی او وايي چې په دې کال کې ۱۲۲ خبریالان او د رسنیو کارکوونکي وژل شوي دي.
نوموړي فدراسیون سهشنبه د ډېسمبر پر ۳۱مه راپور ورکړی چې په وژل شویو خبریالانو کې ۱۴ یې ښځینه دي.
د دغه سازمان د راپور پر بنسټ، د خبریالانو د وژنو ۵۸ سلنه پېښې د فلسطین، لبنان او سوریې په ګډون په منځني ختیځ کې شوې دي.
په دغه راپور کې راغلي چې د ۲۰۲۳ کال د اکتوبر له ۷مې راهیسې په فلسطین کې د وژل شویو خبریالانو شمېر ۱۴۷ کسانو ته رسېدلی دی.
دغهراز یاد بنسټ زیاته کړې چې د ۲۰۲۴ کال پرمهال په اسیايي هېوادونو کې ۲۲ خبریالان وژل شوي دي.
د دغه سازمان د معلوماتو له مخې، سږکال یوازې په پاکستان کې اووه خبریالان وژل شوي او همداراز په هند کې د درې کسانو د وژل کېدو پېښې ثبت شوې دي.
ورته مهال، د خبریالانو نړیوال فدراسیون د ۲۰۲۴ کال پرمهال په امریکا کې نهه او په اروپايي هېوادونو کې د څلورو نورو خبریالانو د وژل کېدو یادونه کړې ده.
دغه سازمان تېرکال د نړۍ په بېلابېلو برخو کې د خبریالانو لپاره ترټولو مرګونی کال بللی و او له ملګرو ملتونو یې د هغوی د خوندیتوب غوښتنه کړې وه.
