په افغانستان کې ۱۳میلیونه وګړي د خوراکي توکو له کمښت سره مخامخ دي

د سره صلیب نړیوال بنسټ او افغانۍ سرې میاشتې ټولنې اعلان کړی چې په روان میلادي کال کې به د افغانستان له درېيو یوه برخه وګړي د وچکالۍ له امله د خوراکي توکو له کمښت سره مخامخ شي. دغه بنسټ په افغانستان کې د وچکالۍ او لوږې له امله ناورین د مخنیوي په موخه د چټکو اقداماتو غوښتنه کړې ده.
د سره صلیب د نړیوال بنسټ او افغانۍ سرې میاشتې ټولنې په اعلامیه کې راغلي چې وچکالي او د خوړو ناورین، د افغانستان د تېرو لسیزو ستونزې دي او د وروستیو شمېرو پر بنسټ ۱۳،۱ میلیونه وګړي د خوراکي توکو له کمښت سره مخامخ دي. دا اعلامیه د وري په ۳۱مه نېټه خپره شوې ده.
د اعلامیې له مخې، دا هغه ننګونه ده چې خوراکي خوندیتوب له منځه وړي، ټولنیزې او اقتصادي ستونزې زیاتوي او ترڅنګ یې د کورونا ویروس د خپرېدو له امله په افغانستان کې د میلیونونو وګړو ژوند ګواښي.
د افغاني سرې میاشتې ټولنې سرپرستې نیلاب مبارز ويلي چې په ډېری سیمو کې د وچکالۍ د اغېزو، د خوراکي توکو د کمښت، اقتصادي فعالیتونو د درېدو او د خلکو د اساسي عوایدو د کمښت په اړه اندېښنه لري.
سرې میاشتې ټولنې ويلي چې له دغې ټولنې د ملاتړ لپاره یې د بیړنیو مرستو غوښتنه کړې ترڅو په لسو ولایتونو کې د اړمنو لپاره خوراکي توکي برابر کړي.
اټکل شوی چې په ۲۰۲۱ کال کې به په افغانستان کې د غنمو حاصلات کابو ۲۷ سلنه کم شي.د سره صلیب نړیوال فډراسیون او افغاني سرې میاشتې ټولنې له افغانانو سره د چټکو مرستو غوښتنه کړې ده.