۸صبح، ننګرهار: په ننګرهار کې طالبان وايي چې ۳۸ افغانان د پاکستان له زندانونو څخه ازاد او هېواد ته راستانه شوي دي.
د ننګرهار لپاره د طالبانو د اطلاعاتو او کلتور مشر قریشي بدلون سهشنبه د سلواغې پر ۲مه ویلي چې دا کسان د قانوني اسنادو لرلو سربېره د څلورو ورځو لپاره د پاکستان په «حاجي کمپ» زندان کې بندیان شوي وو.
هغه زیاته کړې چې دا کسان تېره ورځ د تورخم له لارې هیواد ته راستانه شوي دي.
دا بندیان د ننګرهار، لوګر، کابل، پکتیا، هرات، غزني، تخار او څو نورو ولایتونو اوسېدونکي دي.
په دې وروستیو کې شاوخوا ۱۰۰ افغانان د پاکستان له زندانونو څخه ازاد او هېواد ته راستانه شوي دي.
دا په داسې حال کې ده چې پاکستاني پولیسو شاوخوا دوه اوونۍ دمخه په اسلاماباد کې د افغان کډوالو نیول پیل کړي او دا بهیر لاهم دوام لري.
