۸صبح، کابل: په افغانستان کې د اروپايي ټولنې استازولۍ او د ملګرو ملتونو د کډوالو عالي کمیشنرۍ وايي چې دغو دواړو بنسټونو د افغان کډوالو او بې ځایه شویو خلکو د ملاتړ لپاره د ۳۶ ملیون یورو تړون لاسلیک کړی دی.
نوموړې ټولنې شنبه د مرغومې پر ۲۹مه، په یو بیان کې زیاته کړې چې د دغه تړون پر بنسټ به د سلګونو زرو افغان کډوالو او راستنېدونکو ملاتړ وشي.
په بیان کې ویل شوي چې دا تړون د افغانستان لپاره د ملګرو ملتونو د کډوالو عالي کمېشنرۍ (UNHCR) د ۱۱۰ میلیونه یورو د پراخ ملاتړ یوه برخه ده.
اروپايي ټولنې ویلي چې په ټوله نړۍ کې په میلیونونو افغانان کډوال او بې ځایه شوي او په همدې ډول له درېیو میلیونو څخه ډېر په هېواد کې دننه بې ځایه شوي دي.
د اروپايي ټولنې استازولۍ ټینګار کړی چې که څه هم په افغانستان کې امنیتي نښتې کمې شوي، خو د جنسیت پر بنسټ تاوتریخوالی او د ښځو له حقونو سرغړونې ډېرې شوې دي.
دا پروګرام به د ۲۰۲۵ له جنورۍ څخه تر ۲۰۲۷ پورې دوام ولري او په کې به د کډوالو ساتنه، ښوونه او روغتیاپالنه شامله وي.
دا په داسې حال کې ده چې په دې وروستیو کې د افغان کډوالو د ایستلو څپه په ځانګړې توګه له ایران او پاکستانه پراخه شوې ده.
