۸صبح، غور: د غور جام څلي ته نږدې د لرغونو اثارو موندل کېدو په تړاو د ۸صبح ورځپاڼې خبر له خپرېدو وروسته، په دغه ولایت کې ځايي طالب چارواکو د ۴۰ قلمه لرغونو اثارو له موندلو او اطلاعاتو او کلتور ریاست ته یې د سپارلو خبر ورکړی دی.
په غور کې د طالبانو اطلاعاتو او کلتور ریاست شنبه د غبرګولي پر ۵مه ویلي چې جام څلي ته څېرمه له سېلابونو وروسته کشف شوي ۴۰ قلمه لرغوني اثار دغه ریاست ته سپارل شوي دي.
نوموړي ریاست ویلي چې د دغو بېلابېل ډوله اثارو مخینه د غوریانو دورې ته ورګرځي.
له دې وړاندې سیمهییزو سرچينو ۸صبح ورځپاڼې ویلي و چې له وروستي سېلاب وروسته د دغه ولايت په يوې سيمه کې څو قلمه تاريخي اثار ترلاسه شوي او طالبانو په دې هکله رسنيو ته څه ویلي نه دي.
د معلوماتو له مخې، ځينې موندل شوي اثار فلزي لوښي دي چې تاریخي مخینه لري.
جام دره په غور کې یوه لرغونې سیمه ده چې له تېرو څو کالو راهيسې ناقانونه کېندنې پکې کېږي.