۸صبح، کابل: ۴۳ هېوادونو له طالبانو غوښتي چې په افغانستان کې د ښځو او نجونو پر حقونو لګېدلي ټول بندیزونه سملاسې لرې کړي.
په ملګرو ملتونو کې د فرانسې استازي ژروم بونافون چهارشنبه د وږي پر ۲۵ مه، د لاسلیک کوونکو هېوادونو په استازیتوب وویل چې طالبانو د ۲۰۲۱ کال له اګسټ راهیسې د جنسیتې تفکیک سیاست پلې کړی او زده کړو، روغتیایې اسانتیاوو او کار ته یې د ښځو او نجونو لاسرسې په پراخه کچه محدود کړی دی.
دغو هېوادونو ویلي هغه ښځې چې د طالبانو له بندیزونو سرغړونه کوي یا داسې وګڼل شي چې سرغړونه یې کړې، له خپلسرو نیونو او بند سره مخ کېږي.
دوی زیاته کړې چې د ښځو د حقونو ملاتړي او د طالبانو پر حکومت نېوکه کوونکي هم له نیول کېدو او غچاخیستونکي چلند سره مخ دي.
لاسلیک کوونکو هېوادونو له طالبانو غوښتي چې د بشري حقونو سرغړونو ته د پای ټکی کېږدي او پر ښځو او نجونو لګېدلي بندیزونه په ټولو برخو کې لرې کړي.
طالبانو د ۲۰۲۱ کال په اګسټ کې له بیا واکمنېدو وروسته د ښځو او نجونو پر زدهکړو، کار، تګراتګ او په عام ژوند کې یې پر ګډون پراخ محدودیتونه لګولي دي.
نجونې له منځنیو زدهکړو او ښځې د پوهنتوني زدهکړو او د ډېرو دندو له ترسره کولو بې برخی شوې دي.
همداراز، له محرم پرته د ښځو تګراتګ او په عامو ځایونو کې یې پر حضور هم محدودیتونه لګېدلې دي.
