۸صبح، ننګرهار: سیمهییزې سرچینې وايي چې د کابل – ننګرهار لویه لار د سختو ورښتونو او غر ښویېدنې له امله تړل شوې ده.
سرچینو پنجشنبه د لړم پر ۲۱مه له ۸صبح ورځپاڼې سره په خبرو کې وویل چې دا لویه لار د بارانونو، غر ښویېدنې او په څو برخو کې د ډبرو راښویېدو له امله د ترافیکو پر مخ تړل شوې ده.
د سرچینو په وینا، دا لار له نن ماښام راهیسې د ترافیکو پر مخ تړل شوې او اوسمهال د مسافروړونکو او باروړونکو لسګونه موټر د لارې په بېلابېلو برخو کې بند پاتې دي.
سرچینې وایي چې طالبانو د ننګرهار په درونټې سیمه کې د تلاشۍ پوستې جوړې کړې او هغو موټرو ته چې له دې لارې د تللو تکل لري، د تګ اجازه نه ورکوي.
دا په داسې حال کې ده چې د طالبانو د ترانسپورټ او هوايي چلند وزارت د هوا پېژندنې ریاست د هېواد په ۳۳ ولایتونو کې د سختو بارانونو او ناڅاپي سېلابونو خبر ورکړی و.
