د اسټراليايي رسنيو په حواله د دې هېواد دولت شاوخوا ۸۰ تنه هغه افغان ژباړونکي او کورنۍ يې استراليا ته لېږدولي چې له استراليايي ځواکونو سره يې افغانستان کې د ژباړونکو په توګه کار کوه.
د استراليا هېواد دغه پرېکړه داسې مهال کوي چې څو ورځې وړاندې يې په کابل کې خپل سفارت هم وتړه.
استراليایي چارواکو ويلي دغو ژباړونکو او کورنيو ته يې افغانستان کې سختې جګړې او دوی ته د متوجه ګواښونو په پار استراليا ته د تګ او هلته د پاتې کېدو اجازه ورکړې او په دې سره به دوی خوندي پاتې شي.
دې وروستيو کې امريکا او انګلستان هم ویلي چې له افغانستانه د بهرنیو ځواکونو له وتلو وړاندې به افغان ژباړونکو او کارکوونکو ته د اقامت د ورکولو بهیر چټک کړي.
تېره جمعه امريکايي رسنيو راپور ورکړ چې د امریکا حکومت په پام کې لري څو د امریکايي پوځيانو لسهاوو زره تنه ژباړونکي او نور هغه کارکوونکي، چې افغانستان کې له امریکايي پوځيانو سره يې کار کړی له افغانستانه بهر کړي.
د امریکا يو لوړپوړي چارواکي اسوشیټېډ پرېس سره په خبرو کې ویلي، چې دې وروستیو کې بهر ته د هغو افغانان ژباړونکو او کارکوونکو د ويستلو پروسه چټکه شوی، چې تېرو ۲۰ کلونو کې يې له امریکايي سرتېرو سره مرسته کړې وه او همکاران پاتې شوي ؤ.
