۸صبح، کابل: د ملګرو ملتونو د بشري مرستو د همغږۍ دفتر (اوچا) افغان کورنیو ته د خوړو او روغتیايي خدمتونو د لاسرسي پر اهمیت ټینګار کړی دی.
اوچا شنبه د لړم پر ۲مه، د ملګرو ملتونو د تاسیس د یو اتیايمې کلیزې په مناسبت ویلي چې د خپلو بشري مرستو له شریکانو سره په همکارۍ د افغانستان په ټولو سیمو کې له کورنیو ملاتړ کوي.
دغه دفتر زیاته کړې چې د دې همکاریو موخه له کورنیو سره د ناورينونو پر وړاندې مبارزه او د هغوی د ژوند د وضعیت ښه کولو په برخه کې مرسته ده.
اوچا ټینګار کړی چې خوړو، روغتیايي خدمتونو او بشري مرستو ته لاسرسی له کورنیو سره مرسته کولای شي چې د ستونزو پر وړاندې مقاومت وکړي.
دا په داسې حال کې ده چې د اقتصادي او بشري ناورينونو دوام، د کډوالو پراخ راستنېدل او د اقلیمي بدلونونو پایلو په افغانستان کې د میلیونونو کسانو د ژوند وضعیت لا سخت کړی دی.
