یاد بند د خوست ولایت مرکز اړوند د متنو کلي په سیمه کې موقعیت لري، چې د جوړېدو چارې یې د کلیو او پراختیا وزارت د انسجام ساحوی برنامې لخوا د ۳۳ ملیون افغانیو په لګښت بشپړې او د ۱۴۰۰ کال د غبرګولي په ۱۵مه د شنبې په ورځ د خوست والي تورن جنرال مهمند کټوازي لخوا ګټې اخیستنې ته وسپارل شو.
د خوست ولایت د چارواکو په خبره، دغه بند اوس مهال د ۱۲۰۰۰ جریبه کرنيزه ځمکې د خړوبولو وړتیا لري او ګڼ شمېر هغه کرنيزې ځمکې به بیا ابادې شي چې د اوبو د کمښت له امله شاړې شوې وې.
د خوست والي ویاند طالب منګل، ۸صبح سره په خبرو کې وویل: ياد بند د سیمې د اوسېدونکو پر کرنيزو تولیداتو ښه اغېز کولای شي.
منګل د دغه بند د پرانیستې ترڅنګ په یاده سیمه کې د ۱۹ ميلیونه افغانیو په لګښت د ۷۱۰ متره په اوږدوالي سره د استنادي دېوال د جوړولو یادونه هم وکړه.
د والي وياند زياته کړه، یاد استنادي دېوال چې د جوړېدو چارې يې تازه په تازه پیل شوې، په جوړېدو سره به يې د سیمې ډېره اندازه کرنيزه ځمکه چې د سېلابونو د راوتلو له امله د احتمالي زیانونو سره مخ ده وژغورل شي.
خوست د سویل ختیځ زون په کچه هغه ولایت دی چې کرنیزه حاصل خېزه ځمکه لري او د کال په څلورو فصلونو کې بېلابېل ډوله کرنيز تولیدات لري.