۸صبح، کابل: د ملګرو ملتونو د ماشومانو د ملاتړ صندوق (یونیسف) اعلان کړی چې په افغانستان کې میلیونونه ماشومان د اقلیمي بدلونونو له امله رامنځته کېدونکو ګواښونو سره مخ دي.
دغه بنسټ پنجشنبه د تلې پر ۳۰مه په یوه راپور کې ویلي چې افغانستان د اقلیمي بدلونونو د زیانمنولو له پلوه د سویلي اسیا هېوادونو په سر کې دی.
یونیسف زیاته کړې چې په افغانستان کې میلیونونه ماشومان هممهاله له وچکالۍ، سېلابونو او د تودوخې له څپې سره مخ دي.
د اورلګېدنې پېښې او د شګو او دوړو توپانونه هم هغه ګواښونه دي چې د ماشومانو ژوند له خطر سره مخ کوي.
یونیسف زیاته کړې چې دا پېښې د څښاک پاکو اوبو، روغتیايي خدمتونو او د حفظالصحې اسانتیاوو په ګډون بنسټیزو خدمتونو ته د ماشومانو لاسرسی له خنډ سره مخ کوي.
په افغانستان کې د یونیسف استازي تاجالدین اویوالې ویلي چې پاکو اوبو ته لاسرسی د اقلیمي بحران پر وړاندې د ماشومانو د روغتیا، کرامت او راتلونکي د خوندیتوب غوره لار ده.
