د مـلابـرادر پـه مشـرۍ پلاوي ایران ته سفر وکړ

په قطر کې د طالبانو ډلې د سیاسي دفتر ویاند ایران ته ددې ډلې د یوه پلاوي د سفر خبر ورکړی دی.
محمد نعیم وردګ په خپله ټویټر پاڼه لیکلي چې د طالبانو سیاسي مرستیال او د قطر دفتر رییس ملابرادر او ملګري پلاوي یې د سلواغې په اوومه نېټه د ایران حکومت په رسمي بلنه دغه هېواد ته سفر وکړ.
د ښاغلي وردګ په وینا، ملابرادر او ورسره پلاوي یې له ایرانیو چارواکو سره په کتنه د دواړو هېوادونو د اړیکو، په ایران کې د افغان کډوالو د وضعیت، د افغانستان او سیمې د سیاسي او امنیتي حالاتو په اړه خبرې اترې وکړې.
ملاعبدالغني برادر له دې مخکې هم ایران ته سفر کړی دی. که څه هم ایران له طالبانو ډلې په وسله وال او مالي ملاتړ تورن دی، خو ددغه هېواد چارواکي له طالبانو سره یوازې رابطه لرل تاییدوي.
له دې مخکې افغان امنیتي چارواکو ویلي چې د هېواد په لوېدیځ کې له طالبانو ترلاسه شوې وسلې ایرانۍ دي.
په وروستي مورد کې د ایران د بهرنیو چارو وزیر محمد جواد ظریف وېلي چې هېواد یې له طالبانو سره رابطه لري او افغان دولت له دې موضوع خبر دی. ظریف دا رابطه له افغانستان سره د دغه هېواد د سرحدي امنیت لپاره مهمه بللې ده.