۸صبح، کابل: د بیلاروس ولسمشر الکساندر لوکاشېنکو ویلي چې افغانستان او سوریه له بیلاروس سره د همکارۍ غوښتونکي دي.
نړیوالو رسنیو جمعه د مرغومې پر ۲۸مه د نوموړي په حواله راپور ورکړی چې سوریې د ګډې همکارۍ په تړاو د خبرو لپاره د بیلاروس د استازو د وربللو غوښتنه کړې ده.
لوکاشینکو زیاته کړې چې طالبانو هم د بیلاروس محصولاتو ته لېوالتیا ښودلې ده.
هغه همداراز زیاته کړې چې په دې هېوادونو کې پیچلي وضعیت د همکارۍ لپاره ننګونې رامنځته کړې دي.
لوکاشېنکو ټینګار کړی چې د بیلاروس بهرنۍ سوداګري تر ډېره ختیځ لور ته متمرکزه ده، خو له لوېدیځ سره همکاري په بشپړه توګه پرېښودل شوې نه ده.
هغه روسیه او چین د بیلاروس اصلي سوداګریز شریکان ګڼلي او په وینا یې، د پاکستان او اندونیزیا په ګډون اسیایي هېوادونه هم غواړي چې له بیلاروس سره همکاري وکړي.
