۸صبح، لوګر: په لوګر ;X سیمهییزې سرچینې وايي چې د طالبانو یوه پخواني ولسوال خپله پیغله لور وروسته له هغې په ډزو وژلې چې نوموړې یې له خپل کوژدن سره د خبرو پر مهال لیدلې وه.
سرچینو سهشنبه د وږي پر ۳۱مه ۸صبح ورځپاڼې ته وویل چې دا پېښه د لوګر مرکز اړوند د حصارک په کلي کې شوې او دغه نجلۍ له ټپي کېدو وروسته کابل ته د لېږدولو پر مهال مړه شوې ده.
د سرچینو په خبره، په لوګر کې د طالبانو پخواني ولسوال ملا وليالله له دې مخکې خپلې لور ته خبرداری ورکړی و چې له خپل کوژدن سره د ټیلیفون له لارې خبرې ونه کړي.
سرچینې وايي چې دغه طالب چارواکي څو ورځې وړاندې کور ته تر راستنېدو وروسته خپله لور د موبایل له لارې له خپل کوژدن سره د خبرو پر مهال لیدلې او وروسته یې پرې ډزې کړې دي.
د سرچینو په خبره، د نجلۍ په سینه درې مرمۍ لګېدلې او سخته ټپي شوې وه؛ خو په پل علم ښار کې د نجلۍ د درملنې امکانات نه و او کابل ته د لېږدولو پر مهال یې ساه ورکړې ده.
سرچینې همداراز وايي چې ملا وليالله د خپلې لور په جنازه کې ګډون نه دی کړی.
د سرچینو په خبره، دغه کس تر دې مخکې د لوګر د خوښۍ ولسوالۍ ولسوال و او اوس هم په یوه اداره کې دنده لري.
سرچینې ادعا کوي چې د ملا وليالله خور د طالبانو د ویاند ذبیحالله مجاهد لومړۍ مېرمن ده او د ولسوال په توګه یې ګومارنه هم له دغه طالب چارواکي سره د کورنۍ اړیکو له امله شوي وه.
