۸صبح، غزني: د غزني یوه اوسېدونکي په ۱۰ میلیونو افغانیو د دغه ولایت د مرکز اړوند «حیدراباد» ښوونځي ته د یوې نوې ودانۍ د رغولو چارې پیل کړې دي.
د طالبانو تر کنټرول لاندې رسنیو یکشنبه د زمري پر ۱۱مه راپور ورکړی چې د دغه ښوونځي د ودانۍ د رغولو چارې به په یوه کال کې بشپړې شي.
د غزني د پوهنې رییس میر نصیراحمد حسیني ویلي چې دا ودانۍ به دوه پوړه، ۲۴ درسي ټولګي، دوه اداري خونې او نور ښوونیز تجهیزات ولري.
نوموړي زیاته کړې چې دا ودانۍ په یو جریب ځمکه کې جوړېږي او په بشپړېدو به یې شاوخوا زرو زدهکوونکو ته د زدهکړو زمینه برابره شي.
له دې مخکې هم د غزني په ګډون د هېواد په نورو ولایتونو کې خلکو په شخصي لګښت ښوونځيو ته ودانۍ رغولې دي.
