۸صبح، کابل: په خپرو شویو انځورونو کې ښکاري چې د شانګهای د همکاریو سازمان د ورزشي سیالیو په پرانېستو مراسمو کې د افغانستان د درې رنګه ملي بیرغ پر ځای د طالبانو بیرغ پورته شوی دی.
د طالبانو مرستیال ویاند حمدالله فطرت شنبه د لړم پر ۲۳مه په خپرې کړې خبرپاڼه کې لیکلي چې د دغو سیالیو د پرانېستې په مراسمو کې د طالبانو تر کنټرول لاندې د ورزش عمومي رییس مولوي احمدالله وثیق ګډون کړی و.
په دغو سیالیو کې د ۲۲ هېوادونو د ورزشي مسوولانو په ګډون د بېلابېلو ورزشي برخو دوه زره ورزشکاران ګډون کوي.
فطرت زیاته کړې چې د افغانستان د جودو فدراسیون درې ورزشکاران هم دغو سیالیو کې برخه لري.
د خبرپاڼې له مخې، احمدالله وثیق د دغو مراسمو په څنډه کې د روسیې د ورزش له وزیر او ځینو نورو جګپوړو ورزشي مسوولانو سره کتلي او د ورزشي اړیکو د پیاوړتیا، ګډو همکاریو او د تجربو د تبادلې په اړه یې خبرې کړې دي.
