د ننګرهار ولايت چارواکو په دغه ولایت کې د وروستیو پېښو په تړاو د هدفي وژنو د یوې درې کسیزې ډلې او د طالبانو ډلې دوو غړو د نیولو خبر ورکړ.
دغه کسان د داعش ډلې اړوند دي چې وسلې او داعش ډلې پورې تړلې تبلغاتي پاڼې هم ورسره نیول شوي دي.
د ننګرهار والي او امنیه قومندان نن په يوه خبري ناسته کې وويل، هغه طالب يې هم نيولی دی چې د دولت له لوري د طالبانو پنځه زره زندانیانو په ډله کې ازاد شوی ؤ.
د ننګرهار والي ضیاءالحق امرخېل وويل، د جلال اباد ښار څلورمې ناحيې سيمه کې د درې تروريستي پېښو درې کسیزه شبکه چې د داعش ډلې غړي دي، د یوې رېکشا، درې ميله کلاشنکوفونو، دوه ميله تومانچو، يو قبضه لاسي بم، د داعش تبليغاتي پاڼو، دوه عدده د ريکشا نمبرپليټونو او دوه موبايلونو سره یو ځای د پولیسو له لوري نیول شوې ده.
نوموړي څرګنده کړه، نیول شويو کسانو دوه ورځې وړاندې د ننګرهار په دويمه ناحيه کې د برښنا رياست ګومارل شوی پولیس وژلی وه او په همدې ورځ په ورته بله پېښه کې يې په څلورمه ناحيه کې د ۹۹۹ قطعې یو سرتېری او يو رېکشا چلوونکی په ډزو ټپيان کړي ؤ او یو ملکي وګړی یې هم وژلی ؤ.
د ننګرهار والي په خپلو خبرو کې وويل چې پولیسو د شينوارو ولسوالۍ په مربوطاتو کې د حکمت الله په نامه د طالبانو يو غړی چې په خذيفه مشهور دی، نيولی دی. هغه وويل، دغه کس د وسله والو طالبانو هغه غړی دی چې څه موده وړاندې د پنځه زرو طالب بنديانو په لېست کې له بګرام زندان څخه ازاد شوی ؤ او بېرته يې ترهګريزو فعاليتونو ته مخه کړې وه. له دغه شخص سره یو میل بې غږه تفنګچه هم د پوليسو لاس ته ورغلې ده.
امرخېل همداراز وويل چې د ننګرهار امنيتي ځواکونو د جلال اباد ښار درېيمه ناحیه کې د عبدالحق په نوم د داعش ډلې د تبليغاتو د برخې يو غړی د تبليغاتي ويډيوګانو او نورو مواد سره نيولی دی.
د ننګرهار امنیه قومندان جمعه ګل همت د امنيه قومندانۍ د لاسته راوړنو په خوا کې د پولیسو په لیکو کې د اصلاحاتو په اړه خبرې وکړې. نوموړي وويل چې د امنیه قومندانۍ لخوا په وروستيو اصلاحاتو کې يې د پاکستان قونسلګرۍ مخکینی قومندان له پنځو ساتونکو سره له دندې څخه د ناوړه ګټې اخيستنې په تور توقيف کړی دی.
ښاغلي همت زیاته کړه چې له امنیتي ځواکونو سره د ولس همکاري اړینه او ضروري ده.