۸صبح، غزني: د غزني د دهیک ولسوالۍ اوسېدونکو په شخصي لګښت یو روغتیايي مرکز جوړ کړی دی.
په غزني کې د طالبانو د عامې روغتیا ریاست پنجشنبه د سلواغې پر ۵مه یوې خبرپاڼه کې ویلي چې دا روغتیايي مرکز د دهیک ولسوالۍ په «لغباد» کلي کې ګټې اخیستنې ته سپارل شوی دی.
پر دغه روغتیايي مرکز یو میلیون او ۳۰۰ زره افغانۍ لګښت راغلی دی.
په خبرپاڼه کې راغلي چې دا روغتیايي مرکز څلور بستر لرونکې کوټې، درې تشنابونه او یو سالون لري.
دا په داسې حال کې ده چې موده وړاندې د دغه ولایت د مالستان ولسوالۍ اوسېدونکو په لګښت یو ۵۰ بستریز روغتون جوړ شوی و.