۸صبح، غور: په غور، غزني او پکتیا کې ځايي سرچینې وايي چې په دغو ولایتونو کې د جلا ترافیکي پېښو په پاېله کې شپږ کسان مړه او ۳۵ نور ټپيان شوي دي.
سرچینو دوشنبه د زمري پر ۲۹مه ویلي چې د غور لعل او سرجنګل ولسوالۍ په «دهن قاشق سفیدچشمه» سیمه کې د یوې ترافیکي پېښې لامله څلور کسان مړه او ۱۴ نور ټپيان دي.
د سرچینو په وینا، په قربانیانو کې ښځې او ماشومان هم دي.
سرچینو زیاته کړې چې په موټر کې د یوې کورنۍ غړي سپاره وو چې د لعل او سرجنګل ولسوالۍ څخه د دایکندي سنګ تخت ولسوالۍ ته روان وو.
سرچینو د اوو کسانو روغتیايي حالت نازک ښوولی دی.
ورته مهال، په غزني کې ځايي طالب چارواکي وايي چې د دغه ولایت په جغتو ولسوالۍ کې د یوه تراکتور موټر چپه کېدو په پېښه کې دوه کسان مړه او اته نور ټپيان شوي دي.
په غزني کې د طالبانو امنیې قوماندانۍ رسنیز دفتر ویلي چې دا پېښه نن ماسپښين د جغتو ولسوالۍ په سراب سیمه کې شوې ده.
نوموړي دفتر زیاته کړې چې په ټپيانو کې پنځه ښځې هم دي او د غزني ولایتي روغتون ته وړل شوې دي.
د خپرو شویو معلوماتو په حواله، د دغې پېښې قربانیان د یوې کوچۍ کورنۍ غړي او له یوې سیمې بلې سیمې ته د تګ په حال کې وو.
اخوا، د لوګر – پکتیا پر لویه لار د یوې ترافیکي پېښې په پاېله کې ۱۳ کسان ټپیان شوي دي.
سرچینو ویلي چې پېښه په تیره کوتل کې شوې او ټپيان د ګردیز ولایتي روغتون وړل شوې دي.
د دغو ټولو ترافیکي پېښو لامل د موټروانانو بېاحتیاطي ښوول شوې ده.
