۸صبح، کابل: طالبانو ویلي چې د ازبکستان د لومړي وزیر مرستیال جمشید خواجهیف په مشرۍ د دغه هېواد یو پلاوی پر اقتصادي مسایلو د خبرو لپاره کابل ته رسېدلی دی.
باختر خبري اژانس شنبه د زمري پر ۳مه راپور ورکړی چې په دغه پلاوي کې د ازبکستان د دولتي ادارو چارواکي او د خصوصي سکټور استازي هم شته.
د طالبانو د صنعت او سوداګرۍ وزارت ویلي چې دا پلاوی به له طالب چارواکو او د افغانستان د خصوصي سکټور له استازو سره خبرې وکړي.
د نوموړي وزارت په خبره، د ازبکستان دا پلاوی به د افغانستان – ازبکستان تر منځ په سوداګریزه ناسته کې چې په کابل کې د سلګونو سوداګرو او پانګوالو په ګډون جوړېږي، ګډون وکړي.
دا سفر داسې مهال شوی چې طالبان د سیمې له هېوادونو سره د اقتصادي او سوداګریزو اړیکو د پراخېدو هڅې کوي.
