۸صبح، ننګرهار: په ننګرهار کې ځايي سرچینې وايي، په دغه ولایت کې د هاوان د یوې مرمۍ چاودنې د يو ماشوم ژوند اخيستی دی.
سرچینو دوشنبه د لړم پر ۴مه، ۸صبح ورځپاڼې ته ویلي چې دا پېښه پرون ماښام د دغه ولایت د شیرزادو ولسوالۍ په ګندمک سیمه کې شوې ده.
د سرچینو په وینا، پېښه هغه مهال شوې چې یوه ۱۲ کلن ماشوم د هاوان د یوې مرمۍ له موندلو وروسته ورسره لوبې کولې.
په افغانستان کې د تېرو جګړو ناچاودېدلي مهمات او چاودېدونکي توکي لا هم د خلکو، په ځانګړې توګه د ماشومانو ژوند ګواښي.
دا په داسې حال کې ده چې څه موده وړاندې هم د دغه ولایت په خوږیاڼو ولسوالۍ کې په ورته پېښه کې درېيو ماشومانو ژوند له لاسه ورکړی و.
