۸صبح، کابل: د ملګرو ملتونو د ماشومانو د ملاتړ صندوق (یونیسف) وايي چې نیمايي افغان ماشومان د خوړو له شدیدې بېوزلۍ سره مخ دي او بېلابېلو او مغذي خوراکي توکو ته لاسرسی نه لري.
یونیسف دوشنبه د لړم پر ۲۵مه په اېکس پاڼه کې لیکلي چې د خوارځواکۍ درملنه د ماشومانو ژوند ژغوري، خو مخنیوی یې هومره ارزښت لري.
دغه سازمان د بریتانیا له ځانګړي استازي ریچارډ لېنډسي سره په یوې ګډې مقالې کې په افغانستان کې د کوچنیو ماشومانو د تغذیې وضعیت د ښهوالي لپاره د بریتانیا د ملاتړ څرنګوالی ارزولی دی.
د مقالې له مخې، یوازې په ۲۰۲۶ کال کې په افغانستان کې شاوخوا ۳.۷ میلیونه ماشومان پر شدیدې خوارځواکۍ اخته شوي دي.
یونیسف خبرداری ورکړی چې کوچني ماشومان له نورو ډېر له ګواښ سره مخ دي، داسې چې د دغو ماشومانو شاوخوا ۸۰ سلنه یې چې له ډنګروالي کړېږي، له دوو کالو کم عمره دي.
دغه بنسټ ټینګار کړی چې د خوارځواکو ماشومانو درملنه که څه هم اړینه او د ژوند ژغورلو لپاره مهمه ده، خو د دغه ناورین د مخنیوي لپاره بسنه نه کوي او د خوارځواکۍ له رامنځته کېدو مخکې دې هم د مخنیوي لپاره اقدامات وشي.






