چارواکي وايي، تېره ورځ د چنګاښ په ۲۳مه د چهارشنبې په ورځ ناوخته د نورستان نورګرام ولسوالۍ او د لغمان الینګار ولسوالۍ اړوند سیمه کې پر یوه کور د هاوان مرمۍ لګېدلي، چې له امله يې ۵ تنه مړه شوي او ۱۲ تنه ټپيان شوي دي.
د لغمان د والي ویاند اسدالله دولتزي ۸صبح ته وويل، چې پېښه د لغمان الینګار ولسوالۍ ته نږدې د نورستان اړوند نورګرام ولسوالۍ «خلیل» سیمه کې شوې ده.
دولتزی وايي، د هاوان مرمۍ په یوه کور لګېدلې چې ۵ تنه په کې وژل شوي او ۱۲ نور ټپیان شوي دي.
هغه اداعا کوي، چې د هوان مرمۍ د طالبانو له لورې توغول شوې ده، خو طالبان په دې پېښه کې لاس لرل ردوي.
دولتزی وايي: « طالب ترهګرو تل ولس ته په دغسې ړندو مرمیو مرګ ژوبله اړولې او دوی ته د افغان وژنې او ورانۍ ماموریت ورکړل شوی.»
خو د بشرحقونو یوې بلې ځايي سرچینې ویلي، پېښه کې ۵ تنه وژل شوي او ۵ نور ټپیان دي، چې ټول د یوې کورنۍ غړي دي. سرچینه وايي، د قربانیانو خپلوانو ادعا کړې، چې هوان مرمۍ د ملي اردو ځواکونو له لوري توغول شوې ده.
له سیمې څخه بیا د پېښې عینې شاهدانو ځايي رسنیو ته ویلې، چې د هاوان مرمۍ د الینګار او نورګرام ولسوالیو ترمنځ د خلیل اباد سیمې په یوه کور لګېدلې ده.
عینې شاهدانو ویلي، چې په دې پېښه کې د یوې کورنۍ ۵ تنه وژل شوي او ۵ نور ټپیان شوي دي.
دوی ویلي، په وژل شویو او ټپیانو کې ښځې او ماشومان هم شامل دي او په وینايي، چې اوس له سیمې ګڼ شمېر خلک نورو امن سیمو ته بې ځایه شوي دي.
د لغمان الینګار ولسوالۍ تېره ورځ د چنګاښ په ۲۳مه د طالبانو لاسته ورغلې او د راپورونو له مخې د ولسوالۍ ځايي ملکي او امنيتي مسؤلینو ولسوالۍ پرته له جګړې پرېښې وه.
اوس د الينګار د ولسوال په ګډون د دې ولسوالۍ درې نظامیان د لغمان ملي امنیت ریاست نیولي دي.
