ننګرهاری ماشوم چې د يوې ښځې لخوا تښتول شوی ؤ، خپلې کورنۍ ته وسپارل شو

د ننګرهار ولایت امنیه قومندانۍ ویاند فرید خان وایي، د کورني امنیت پولیسو هغه نوی زېږېدلی ماشوم له تښتونې وژغوره چې د خوږیاڼو ولسوالۍ په روغتون کې له زېږېدلو وروسته د یوې مېرمنې له لوري تښتول شوی ؤ.
د نوموړي په خبره پولیسو هغه مېرمن هم نیولې چې دغه ماشوم یې تښتولی ؤ.
فرید خان زیاتوي، نیول شوې مېرمن اصلاً د ننګرهار ولایت د پچیراګام ولسوالۍ اوسېدونکې ده چې اوس د خیبر پښتونخوا په چارصدې کې ژوند کوي.
د یادونې وړ ده چې د نويو زېږدلو ماشومانو تښتونه په ننګرهار کې څه نوې خبره نه ده، بلکې له دې وړاندې هم د دې ولايت حوضوي روغتون کې ورته پېښه شوې وه.