۸صبح، کابل: د ملګرو ملتونو له ماشومانو د ملاتړ صندوق (یونیسف) اعلان کړی چې د افغانستان په ختیځ کې له مرګونې زلزلې یوه میاشت وروسته په کونړ، ننګرهار او لغمان کې زلزلهځپلې کورنۍ لا هم په کنډوالو کې ژوند کوي او تر اوسه یې بېړنۍ اړتیاوې پوره شوې نه دي.
یونیسف دوشنبه د تلې پر ۲۱مه راپور ورکړی چې د څه باندې ۱۱ میلیونو ډالرو بودیجې کمښت دا ګواښ زیات کړی چې کورنۍ له ژمنیو جامو، د تودوخې وسایلو، پاکو اوبو او ماشومانو ته د ځانګړو خدماتو له وړاندې کولو بې برخې پاتې شي، په داسې حال کې چې د دغه سازمان په خبره، اړتیاوې یې تر ټولو لوړې کچې ته رسېدلې دي.
نوموړي بنسټ اعلان کړی چې د یونیسف د اوبو او روغتیا دوه اړخیزه ستراتېژي پر بېړنیو مرستو او اوږدمهاله بیارغونې ورټوله ده چې پکې د ورځې د ۱۸۰ زره لېټره اوبو لېږدول او په کلیو کې د ځپل شویو اوبو د سیسټمونو بیارغول راځي.
د راپور له مخې، د تغذيې د څارنې پایلې ښيي چې په پنډغالو کې د خوارځواکۍ کچه اندېښمنونکې ده او له پنځو کالو کم عمره ماشومانو ترمنځ شدیده خوارځواکي د دوامداره ملاتړ اړتیا لا څرګندوي.
یونیسف خبرداری ورکړی چې لا هم بېړنۍ وضعیت دوام لري، هغه کورنۍ چې په خیمو کې ژوند کوي، د ژمي له یخنۍ او سېلاب له ګواښ سره مخ دي.
د نوموړي سازمان د راپور پر بنسټ، د اړتیا وړ امکاناتو د نشتوالي له کبله د دې ګواښ شته چې لوږه، ناروغي او یخني د مرګونې زلزلې په څېر د خلکو ژوند وګواښي.
