۸صبح، کابل: د ملګرو ملتونو د ماشومانو د ملاتړ صندوق (یونیسف) اعلان کړی چې د افغانستان په ختیځ کې د وروستۍ زلزلې له نیمايي زیات قربانیان، ماشومان دي.
یونیسف سهشنبه د وږي پر ۲۵مه راپور ورکړی چې د دې زلزلې له کبله څه باندې نیم میلیون کسان اغېزمن شوي او ګڼې کورنۍ پاشل شوې دي.
یونیسف ټینګار کړی چې افغان ماشومانو له دې وړاندې هم د نړۍ په کچه له سخت بحران سره مخ وو، خو وروستۍ زلزلې یې کور، امنیت او کورنۍ ترې اخیستې او وضعیت یې ناوړه کړی دی.
نوموړي بنسټ ویلي، سره له دې چې لرې پرتو زلزله ځپلو سیمو ته لاسرسی سخت دی، خو بیا هم د ژغورنې مرستې لکه روغتیايي خدمات، د خوارځواکو ماشومانو درملنه، پاکې اوبه، د مېرمنو او ماشومانو رواني ملاتړ او اړمنو کورنیو ته بېړنۍ نغدې مرستې برابروي.
یونیسف د راتلونکو شپږو میاشتو لپاره د ۲۲ میلیونو ډالرو غوښتنه کړې څو د ۲۱۲ زرو ماشومانو په ګډون ۴۰۰ زره کسان د بشردوستانه مرستو تر پوښښ لاندې راولي.
د یادونې ده چې له دې وړاندې د ماشومانو د ژغورنې سازمان ویلي و چې د افغانستان په ختیځ کې د وروستۍ زلزلې له کبله ۲۶۰ زره ماشومان اغېزمن شوي او بېړنیو مرستو ته اړتیا لري.
