۸صبح، ننګرهار: د ننګرهار د اطلاعاتو او کلتور طالب مسوولان په دغه ولایت کې د «اتفاق نوین» په نوم د یوې راډیو د خپرونو له پیلېدو خبر ورکوي.
د ننګرهار د اطلاعاتو او کلتور طالب امر قریشي بدلون ویلي چې دې راډیو دوشنبه د مرغومې پر ۲۴مه خپلې خپرونې پېل کړي دي.
د نوموړي په خبره، دا راډیو په ۹۸.۴ څپه خپرونې کوي.
همداراز طالبانو د راډیو مسوولانو ته سپارښتنه کړې چې د دغې ډلې رژیم له پالېسۍ سم خپرونې ولري.
واک ته د طالبانو له رسېدو وروسته دا په ننګرهار کې لومړنۍ راډیو ده چې خپلې خپرونې یې پېل کړې.
د دې راډیو خپرونې په داسې حال کې پېل شوې چې طالبانو پر هېواد له واکمنېدو وروسته پر رسنیو ځپونکي بندیزونه لګولي او ان یو شمېر رسنۍ تړل کېدو ته دې اړې شوې دي.
