۸صبح، بادغیس: د بادغیس باوري سرچینې وايي چې طالبانو د دغه ولایت په راډیوګانو کې د ښځو د غږ پر خپراوي بندیز لګولی دی.
سرچینو پنجشنبه د مرغومې پر ۸صبح ورځپاڼې ته وویل چې په بادغیس کې د طالبانو د اطلاعاتو او کلتور ریاست تېره ورځ له خبریالانو او د رسنیو مسوولانو سره په لیدنه کې دا موضوع مطرح کړې ده.
په بادغیس کې د طالبانو د اطلاعاتو او کلتور ریاست زیاته کړې چې د امربالمعروف او نهی عنالمنکر د نوي قانون پر بنسټ، د «ښځو غږ عورت» دی او له دې وروسته به د هغوی د غږ خپرېدل منع وي.
د بادغیس طالب مسوولانو په رسمي ډول په دې هکله څه ویلي نه دي.
دا په داسې حال کې ده چې طالبانو درې ورځې مخکې په هرات کې رسنیو ته سپارښتنه کړې وه چې ښځینه ویاندویانې دې «زمونږ او د نورو نارینهوو د تحریک» له امله د ټلوېزیون پر پرده خبرونه نه لولي.
د یادونې ده چې طالبانو تېرکال د خوست ولایت په راډیوګانو کې د ښځو د غږ پر خپراوي بندیز لګولی و.
