کندهار کې د ښوونځي یو زده کوونکي ځان وژنه کړې
۸صبح، کندهار: د همایون په نوم د ښوونځي يو زده کوونکي نن سهار کندهار کې په خپل کور کي ځان ځړولی او ځان وژنه يې کړې ده.
دغه ځوان د محب الله په نوم د یوه ډاکټر زوی ؤ چي د ځان وژني اصلي انګېزه يې لا څرګنده نه ده خو داسي ویل کیږي، چي ښايي په ښوونځي کي محرومي يې د ځان وژنې لامل وي.
د پوهني ریاست ویاند نظر محمد صمیمي وايي، همایون د احمدشاه بابا عالي لیسې د یوولسم ټولګي زده کوونکی ؤ او په روان کال کې یې ۱۳۳ ورځې غیر حاضري کړې وه. د ده په خبره، هر زده کوونکی چي ۹۸ ورځي غیر حاضر شي، له ازموينې محروم کیږي.
د همایون د کورنۍ غړي وايي، هغه د دې لپاره چي له محرومۍ ځان خلاص کړي، د ډاکټر تصدیق هم جوړ کړی ؤ، خو په ښوونځي کې نه و منل شوی.
دا په داسي حال کې ده، چې په دې وروستیو کي په ښوونځیو کي د محرومینو موضوع خورا ګرمه ده او داسې ویل کیږي، چي ډېری محروم شوي زده کوونکي له محرومۍ د خلاصون لپاره د روغتونونو څخه د تصدیق اخیستلو په لټه کي دي.
