۸صبح، لوګر: سیمهییزو سرچینو په لوګر کې د طالبانو د یوه قوماندان د وژل کېدو خبر ورکړې دی.
سرچینو سهشنبه د لړم پر ۱۹مه ۸صبح ورځپاڼې ته وویل چې بیګا د طالبانو د یوې امنیتي پوستې مسوول مولوی مهراب د دغه ولایت د مرکز «تنګي واغوجان» په سیمه کې په مرموز ډول وژل شوی دی.
سرچینو زیاته کړې، د نوموړي جسد پوستې ته په څېرمه سیمه کې موندل شوی او پر بدن یې د وهلو ټکولو نښې هم لیدل شوې دي.
د سرچینو په خبره، دا سیمهییز قوماندان د لوګر د مرکز پلعلم ښار اړوند د پښتوناباد کلي اصلي اوسېدونکی و.
دا په داسې حال کې ده چې درې ورځې مخکې په بغلان کې د طالبانو د کورنیو چارو وزیر سراجالدین حقاني یو شخصي ساتونکی وژل شوی و.
