۸صبح، کابل: په لوګر کې د ملګرو ملتونو د ماشومانو د ملاتړ صندوق (یونیسف) په ملاتړ د واکسیناسیون او واکسینونو د ساتلو د یوه مرکز لپاره د معیاري ودانې چارې پیل شوې دي.
باختر خبري اژانس سهشنبه د وږي پر ۳مه راپور ورکړی چې پر دغه مرکز به ۱۵ میلیونه افغانۍ ولګېږي.
د راپور له مخې، د واکسیناسیون دغه مرکز ودانۍ په یو نیم جریب ځمکه او دوو پوړونو کې جوړېږي.
دا ودانۍ به د واکسینونو د خوندي ساتنې لپاره ځانګړې ځایونه او د روغتیايي چارو د مدیریت لپاره اداري خونې ولري.
ویل شوي چې د دغه مرکز د جوړولو چارې به په لسو میاشتو کې بشپړې شي.
