د امریکا د منځمهالو ټاکنو لومړنۍ پایلې ښيي چې د دغه هېواد د کانګرېس د سنا او استازو جرګې لپاره د ډیموکراټ ګوند نوماندانو بریا ترلاسه کړې ده.
رویټرز د چهارشنبې پر سهار، د نومبر پر ۴مه راپور ورکړی چې د دغو ټاکنو پایلې به د امریکا د ولسمشر ډونالډ ټرمپ د دویمې دورې د ولسمشرۍ په اړه وروستۍ ارزونه روښانه کړي.
د راپور له مخې، اټکل کېږي چې ډیموکراټان به د استازو جرګې اکثریت څوکۍ ترلاسه کړي.
د رایو د شمېرنې لومړنۍ پایلې ښيي چې د ډیموکراټ ګوند دوو نوماندانو، «روی کوپر» او «اني انډروز»، په سنا په جرګه کې د جمهوريپالو له څلورو څوکیو دوه خپلې کړې دي. ډیموکراټان د سنا د کنټرول لپاره دغو څوکیو ته اړتیا لرله.
دا په داسې حال کې ده چې د ټرمپ د محبوبیت کچه د خپل تاریخ تر ټولو ټیټې کچې ته نږدې شوې ده. د راپور له مخې، له ایران سره د جګړې او له امله يې د سونتوکو د بیو له لوړوالي د رایهورکوونکو پراخه نارضایتي د دې وضعیت لاملونه دي.
په همدې حال کې، د ټاکنو د پایلو له اعلان سره هممهاله، د سپینې ماڼۍ یوه چارواکي ویلي چې د ټرمپ نوم د رایې ورکولو پر پاڼه نه و؛ خو هغه د ټاکنیز کمپاین په لړ کې له خپلو پلویانو غوښتي وو چې داسې رایه ورکړي، لکه دی چې خپله نوماند وي.
له دې سره سره، ټرمپ تر دې مخکې په یوه مرکه کې ویلي وو چې که ډیموکراټان د کانګرېس کنټرول ترلاسه کړي، دی د خپلو اجرائیوي واکونو په کارولو سره چمتو دی چې «ښاغلی ویټو» وبلل شي.
