۸صبح، کونړ: د کونړ طالب سیمهییز مسوولان وايي چې په دغه ولایت کې یو سپینږیری سړی د کورني تاوتریخوالي له کبله په ډزو وژل شوی دی.
د کونړ د طالبانو امنيه قوماندانۍ وياند فريد دهقان وايي چې دا پېښه یکشنبه د وږي پر ۱۸مه د دغه ولايت مرکز اسعداباد ښار په «تباکوټ» سيمه کې رامنځته شوې ده.
دهقان د دغې وژنې انګېزه کورنۍ دښمني بللې او په وینا یې، د دغې پيښې د عاملانو پلار څه موده مخکې د مقتول د کورنۍ له خوا وژل شوى و.
د هغه په خبره، طالبانو د دې پېښې په تړاو د دانګام ولسوالۍ دوه اوسېدونکي نيولي دي.
په دې وروستيو کې کونړ کې جنايي پېښې ډېرې شوې دي.
شاوخوا دوه مياشتې مخکې د دغه ولايت په نرنګ ولسوالۍ کې د دوو کورنيو ترمنځ د نښتې په پایله کې یو ځوان وژل شوی و.
