۸صبح، فاریاب: د فاریاب سیمهییزې سرچینې وايي چې ناڅرګندو وسلهوالو په دغه ولایت کې د نظامالدین قیصاري یو ساتونکی په ډزو ویشتی او وژلی یې دی.
سرچینو وویل چې دا سړی نجیباالله نومېده او ناڅرګندو وسلهوالو پنجشنبه د لیندۍ پر ۱۵مه ماښام مهال د فاریاب ولایت په قیصار ولسوالۍ کې په ډزو وژلی دی.
سرچینو زیاته کړې چې نجیبالله د مخکېني نظام د پولیسو غړی و.
ورته مهال، نظامالدین قیصاري د خپلې فیسبوکپاڼې له لارې پو یو خپاره کړي پیغام کې دا پېښه منلې ده.
نوموړي د کوم شخص یا ډلې د نوم له یادونې پرته ليکلي: « د افغانستان دښمنان به د هېواد د ځوانانو په وژلو سره زموږ مخه ونه نيسي او د دې خاورې د دښمنانو پر وړاندې به د پخوا په پرتله پياوړي ودرېږو.»
د طالبانو سیمهییزو مسوولانو تر اوسه په دې هکله څه نه دي ویلي.
د طالبانو د واکمنۍ له پېله تر اوسه د مخکېني دولت لسګونه پوځیان او د سیاسي ګوندونو قومندانانو ته نږدې کسان د دغې ډلې د جنګیالیو او یا د نورو ناڅرګندو ټوپکوالو له خوا وژل شوي دي.
