۸صبح، بلخ: د بلخ په ابوعلي سینا ولایتي روغتون کې يوې ځوانې ښځې پنځه ماشومان زېږولي دي.
د بېپولې ډاکټرانو سازمان (MSF) دوشنبه د چنګاښ پر ۲۹مه، ویلي چې دغه ۲۸ کلنه ښځه نفیسه نومېږي.
د دغه سازمان په وینا، ماشومان له ټاکلي وخته مخکې زېږېدلي او وزن يې کم دی چې له همدې امله ټول پنځه واړه د دغه روغتون د نویو زېږېدلو ماشومانو د ځانګړې پاملرنې (NICU) څانګې ته لېږدول شوي وو.
له نږدې اتو ورځو ځانګړې پالنې وروسته، د ماشومانو روغتیايي وضعیت په تدریجي ډول ښه شوی او د نویو زېږېدلو ماشومانو عادي څانګې ته لېږدول شوي دي.
نفیسې ویلي: «نن زما ټول پنځه ماشومان ژوندي او روغ دي. شیدې څښل یې پیل کړي او د ژېړي ستونزه یې هم حل شوې ده.»
له وخته مخکې او په کم وزن زېږېدلي ماشومان معمولاً د روغتیايي ستونزو د مخنیوي لپاره ځانګړو مراقبتوتو ته اړتیا لري.
د نویو زېږېدلو ماشومانو د ځانګړې پاملرنې (NICU) څانګه د همدې ډول ماشومانو د درملنې او ساتنې لپاره ځانګړې شوې ده.
