۸صبح، پکتیا: په پکتیا کې د طالبانو عامې روغتیا ریاست ویلي چې په دغه ولایت کې یوه ځوانه ښځه پر کانګو ناروغۍ تر اخته کېدو وروسته مړه شوې ده.
نوموړي ریاست پنجشنبه د غبرګولي پر ۲۴مه په یوې خپرې کړې خبرپاڼه کې لیکلي چې دا ښځه ۲۵ کلنه وه او د دغه ولایت په څمکنۍ ولسوالۍ کې پر دې ناروغۍ اخته شوې وه.
د نوموړي ریاست په خبره، دغې ښځې روغتیايي مرکز ته په وخت نه ورتللو لامله ساه ورکړې ده.
د خبرپاڼې په حواله، دا ښځه یوه اوونۍ وړاندې پر دې ناروغۍ اخته شوې؛ خو نن روغتون ته ورغلې وه.
د یادونې ده چې د طالبانو عامې روغتیا وزارت د شمېرو له مخې، په هېواد کې د تېرو دوو میاشتو په موده کې د کانګو ناورغۍ کچه ۳۸ سلنه لوړه شوې ده.
بل پلو، روغتیا نړیوال سازمان ویلي چې په افغانستان کې د لوی اختر په رارسېدو سره کانګو یا د وینې بهوونکې تبې ناورغي مخ په زیاتېدو ده.
نوموړي سازمان ویلي چې کانګو له څارويو انسانانو ته لېږدول کېږي او په وینا یې، دا ناروغي د افغانانو په منځ کې ډېره شوې ده.
د روغتیايي کارپوهانو په وینا، کانګو ناروغي د څارویو د کنې په واسطه د انسان بدن ته ننوځي او نښې یې سردرد، سخته تبه، د ملا او بندونو درد، خوابدي، د سترګو سره کېدل، ستوني درند او ستړیا بلل کېږي.
دغه راز، کانګو یوه وژونکې ناروغي ګڼل کېږي.
ډاکټران سپارښتنه کوي چې پر دې ناروغۍ د اخته کېدو د مخنیوي لپاره باید د څارویو سره د مخامخېدو پرمهال دستکشې، ماسک، موزې او سپینه چپنه واغوستل شي.
