عبدالله: سولې ته د رسېدو لپاره باید تاوتریخوالی پای ته ورسېږي

د ملي روغې جوړې د عالي شورا رییس عبدالله عبدالله وايي چې د تاوتریخوالي د کمښت په اړه هوکړې ته د طالبانو نه حاضرېدل او د هغې مشروط بلل، د سولې لپاره ددې ډلې د ارادې په هکله د افغانانو لپاره پوښتنې راولاړې کړې دي. د هغه په وینا، سولې ته د رسېدو لپاره باید تاوتریخوالی په بشپړه توګه پای ته ورسېږي.
د ملي روغې جوړې د عالي شورا رییس چې په سپېدار ماڼۍ کې یې د دې شورا د ځوانانو کمېسیون د پرانیستلو په مراسمو کې وینا کوله وویل چې د تاوتریخوالي لمن پراخه شوې او په هېواد کې هدفي وژنې روانې دي.
عبدالله ووېل چې جګړه هم روانه ده او د تاوتریخوالي د کمښت پر سر د هوکړې لپاره د خلکو د تمو پرخلاف د جګړې لپاره د طالبانو د ټینګار او ددې ډلې له خوا د تاوتریخوالي د کمښت د مشروط کولو له امله دا هوکړه نه ده شوې.
هغه د سولې له مذاکراتو د خلکو تمه د تاوتریخوالي پر کمښت هوکړه وبلله او وې وېل چې سولې ته د رسېدو لپاره باید عملي ګامونه پورته شي چې خلک یې پایلې په خپلو سترګو وویني.
د سولې د عالي شورا رییس زیاته کړه: «کله چې موږ نه حاضرېږو، د تاوتریخوالي کمښت ته ژمنه ولرو، دا په خپله د افغانانو لپاره یوه لویه پوښتنه رامنځته کوي.»
عبدالله عبدالله په هېواد کې د تاوتریخوالي اوسنی کچه د نه منلو وړ وبلله او ټینګار یې وکړ چې نهیلی نه دی او هڅه کوي چې په هېواد کې د تاوتریخوالي د کمښت او سراسري اوربند په اړه هوکړه وشي.
د هغه په وینا، د افغان دولت مرکچي پلاوی د ملي روغې جوړې د عالي شورا په سپارښتنه قطر ته تللی او هڅه کوي چې په رغنده او انعطاف منونکې روحیې سره د سولې لپاره خپله اراده ثباته کړي.
عبدالله ووېل چې له طالبان هم دا تمه لري او باید په لومړي پړاو کې، پر سراسري اوربند هوکړه شوې وای چې خلک د خپل راتلونکي او برخلیک په اړه ډاډمن شوي وای او د سولې له بهیره یې ملاتړ کړی وای.
د ملي روغې جوړې د عالي شورا رییس ټینګار وکړ چې سولې ته د رسېدو لپاره باید تاوتریخوالی په بشپړه توګه پای ته ورسېږي.
په دوحه کې د مذاکراتو په دوهم پړاو کې چې ټکنی روان دی، په هېواد کې تاوتریخوالی زیات شوی دی. په داسې حال کې چې د دولت مرکچي پلاوي اوربند په دغو مذاکراتو کې لومړیتوب ټاکلی، خو لکه څنګه چې عبدالله عبدالله ووېل، طالبانو د تاوتریخوالي د کمښت په اړه هوکړه په شرطونو پورې اړوند بللې ده. ښاغلي عبدالله د تاوتریخوالي د کمولو لپاره د طالبانو د شرطونو په اړه جزیات نه دي ورکړي.
له دې مخکې د دولت د مرکچي پلاوي غړي محمد امین احمدي وېلي و چې طالبان د تاوتریخوالي له کمولو او اوربند له اعلان پرته د خپلو بندیانو د خلاصون په لټه کې دي او له همدې امله مذاکراتو ته لیوالتیا نه لري. افغان دولت د طالب بندیانو د خلاصون غوښتنه رد کړې ده.