۸صبح، کابل: په افغانستان کې د ملګرو ملتونو د مرستندویه پلاوي (یوناما) سرپرستې جورجیټ ګانیون ویلي، په داسې حال کې چې افغان ښځې له پراخو محدودیتونو سره مخ دي، له هغوی نړیوال ملاتړي میکانیزمونه په کمېدو دي.
ګانیون چهارشنبه د وږی پر ۲۵مه د ملګرو ملتونو د امنیت شورا غونډې ته ویلي چې تېر کال په افغانستان کې د ښځو له خوا شاوخوا درې پر څلورمه برخه اداره کېدونکو بنسټونه د بودیجې له کمښت سره مخ شول او د دغو بنسټونو څه باندې ۸۰ سلنې یې د ښځو او نجونو د اړتیاوو د زیاتېدو خبر ورکړی دی.
نوموړې زیاته کړې چې افغان ښځې د نړیوالې ټولنې تعامل، مرستې او ملاتړ د «هیلو ټکي» ګڼي او له نړیوالو شریکانو یې غوښتي چې د افغان ښځو او نجونو ملاتړ لومړیتوب وګرځوي.
د یوناما سرپرستې یو وار بیا له طالبانو غوښتي چې پر ښځو او نجونو لګېدلي محدودیتونه پای ته ورسوي.
له دې مخکې د ملګرو ملتونو سرمنشي هم امنیت شورا ته په یوه راپور کې د بشري حقونو له تعهداتو او ارزښتونو سره د طالبانو د نه ژمنتیا په اړه اندېښنه څرګنده کړې وه.
