د اوکرایین ولسمشر ولادیمیر زېلنسکي اعلان کړی چې د روسیې له خوا د انرژۍ پر زیربناوو د شپنیو بریدونو له امله په دنیپرو ښار او شاوخوا سیمو کې څه باندې ۶۰۰ زره کسان له برېښنا بېبرخې شوي دي.
اناتولي خبري اژانس یکشنبه د نومبر پر ۸مه راپور ورکړی چې زېلنسکي ویلي، روسیې وړمه ورځ د بېپیلوټه الوتکو په کارولو د «کومیشوواخا» پر سیمه برید کړی دی.
نوموړي زیاته کړې چې په یوه هوايي برید کې ۵۵ کسان وژل شوي، د ژغورنې عملیات له پرلپسې اوو ورځو راهیسې دوام لري او ښايي ځینې کسان لا هم د ویجاړیو لاندې بند پاتې وي.
زېلنسکي په خارکییف کې هم وضعیت ترینګلی بللی او ویلي یې دي چې په څو سیمو کې د برېښنا پرې کېدو ستونزه رامنځته شوې ده.
دغه راز په ژیتومیر سیمه کې د توپچي بریدونو له امله ۱۴۰ استوګنیزې ودانۍ د تودوخې له سیسټمه بېبرخې شوې دي.
زېلنسکي زیاته کړې چې د زیانمنو زیربناوو د بېرته رغولو هڅې د اوکرایین نږدې په ټولو ښارونو کې روانې دي.
نوموړي ویلي چې روسیې په تېره یوه اوونۍ کې د اوکرایین پر ښارونو او سیمو ۱۱۵ بېلابېل توغندي، نږدې یو زرو ۹۰۰ بمونه او تر درې زرو ډېرې بریدګرې بېپیلوټه الوتکې کارولې دي.
