۸صبح، کابل: د کورنيو چارو وزارت سرپرست وايي چې طالبان د خپل کنټرول لاندې سيمو کې عامه تاسيسات ويجاړوي او همداراز د هېواد په سويل کې د هغو ولسواليو له لارې چې دوی يې نيسي پاکستان ته د نظامي تجهيزاتو د لېږد زمينه برابروي.
د کورنيو چارو وزارت سرپرست عبدالستار ميرزکوال د پکتيا ولايت د وضعيت د ارزونې په موخه دې ولايت ته سفر درلود. هغه د چنګاښ په پنځمه، د شنبې په ورځ د پوليسو ځانګړو ځواکونو يوې غونډې ته وينا وکړه.
ميرزکوال وويل چې طالبانو د خپل کنټرول لاندې سيمو کې په خپلو کړنو سره دا وښوده چې دوی پرته له ويجاړۍ بل څه نه دي کړي.
د کورنيو چارو وزارت سرپرست زياته کړه، د طالبانو ډله د ولسواليو په نيولو سره ملي شتمنۍ له منځه وړي او عامه تاسيسات ويجاړوي او همداراز تر خپل کنټرول لاندې سيمو کې د عامه خدمتونو وړاندې کولو په اړه هم کوم خبر نشته.
هغه زياته کړه، طالبان د هېواد په سويل کې د هغو ولسواليو له لارې چې دوی يې نيسي پاکستان ته د نظامي تجهيزاتو د لېږد زمينه برابروي.
د طالبانو ویاند ذبیح الله مجاهد بيا د کورنیو چارو د سرپرست وزیر څرګندونې رد کړې دي. مجاهد وویل چې دوی د جګړې لپاره تجهیزاتو ته اړتیا لري. د هغه په وینا، د افغانستان او پاکستان د حکومتونو ترمنځ د هوکړې له مخې په پوله کې اغزن تارونه جوړ شوي او د تجهیزاتو د لېږد امکان نشته.
طالبانو په مې میاشت کې د سویل او ختیځ ولايتونو په شمول د هېواد په څو ولايتونو کې څو ولسوالۍ نیولې دي.
ځيني ولسوالۍ پرته له جګړې د طالبانو لاس ته لوېدلي دي. طالبانو ادعا کړې په دې ولسواليو کې ډېر شمېر تجهيزات او وسلې ترلاسه کړې دي.
