په روسیه کې افغان سفیر: کابل له مسکو څخه د وسلو او مهماتو اخیستو ته چمتو دی

روسي رسنیو د افغان سفیر سید طیب جواد له خولې لیکلي، چې افغانستان چمتو دی له دغه هېواده وسلې او مهمات وپېري.
سیدطیب جواد له تاس خبري آژانس سره په خبرو کې ویلي، که د دواړو هېوادونو ترمنځ هوکړه وشي، افغانستان به له روسیې پوځي مهمات وپېري. د تاس خبري آژانس راپور د غبرګولي په اتمه نېټه خپور شو.
افغان سفیر هیله څرګنده کړې، چې روسیه به د اردو د پوځي مهماتو په ځانګړې توګه د روسي چورلکو د جوړيدو په برخه کې مرسته وکړي.
ښاغلي جواد ویلې، هیله من دی روسیه افغان میخانیکي انجینیرانو او پیلوټانو ته د زده کړې زمینه هم برابره کړي.
دا په داسې حال کې ده، چې په څو راتلونکو میاشتو کې به بهرني ځواکونه له افغانستانه په بشپړه توګه ووځي.
له دې مخکې د بهرنیو چارو وزیر محمدحنیف اتمر ویلي، چې چین له افغان امنیتي ځواکونو څخه د ملاتړ ټټر وهلی دی.
له افغانستانه د بهرنیو ځواکونو تر وتلو وروسته په هېواد کې د امنیت د ټينګښت مسوولیت افغان امنیتي ځواکونه پر غاړه لري. امنیتي ادارې وایې، چې اوسمهال تر ۹۸ سلنه پوځي عملیات د افغان امنیتي او دفاعي ځواکونو له خوا ترسره کېږي. په ۲۰۱۴ کال کې د امنیتي بهیر له لېږد سره سم د بهرنیو ځواکونو رول تر ډېره روزنیز او مشورتي دی.