په ریاض کې د افغانستان سفارت وايي چې سعودي عربستان ته د هېواد صادرات په ۲۰۲۰ زېږدیز کال کې سل سلنه زیات شوي دي.
په ریاض کې د افغان د سفارت په خبرپاڼه کې چې د غويي په ۲۷مه خپره شوې راغلي، د کورونا ویروس له امله محدودیتونو سره سره د ۲۰۱۹ زېږدیز کال په پرتله په ۲۰۲۰ کال کې سعودي عربستان ته د افغانستان صادرات زیات شوي دي.
د هغو شمېرو له مخې چې په عربستان کې د افغانستان سفارت خپاره کړي، دغه هېواد ته د افغانستان د صادراتو کچه ۱۳،۲۸ میلیون ډالره وه چې دا کچه په ۲۰۲۰ کال کې ۲۸،۵۶ میلیون ډالره زیاته شوې ده.
زعفران، وچه مېوه او غالۍ سعودي عربستان ته تر ټولو مهم صادراتي توکي دي. په ۲۰۲۱ زېږدیز کال کې سعودي عربستان ته د افغانستان د صادراتي توکو ارزښت ۴۲،۵ میلیون ډالره اټکل شوی دی.
د افغانستان سفارت وايي چې افغانستان او سعودي عربستان ژمن دي چې خپلې سوداګریزې اړیکې پراخې کړي.