۸صبح، کابل: د افغانستان د کراټې ملي لوبډلې پخواني لوبغاړي ابوالفضل وارسته د فرانسې د ختیځ زون کراټې جام په وروستیو سیالیو کې یو د سرو زرو او یو د برونزو مډالونه وګټل.
وارسته سهشنبه د لړم پر ۱۵مه نیټه ۸صبح ورځپاڼې ته وویل چې دا سیالۍ دوه ورځې مخکې د فرانسې په ختیځ کې ترسره شوې دي.
د هغه په وينا، په دې سياليو کې د بېلابېلو هېوادونو له ۱۰۰ زياتو ورزشکارانو ګډون کړى و.
نوموړی افغان ورزشکار د «مبارزې» په برخه کې خپلو سیالانو ته په ماتې ورکولو سره د سرو زرو مډال ګټلی دی.
همداراز، وارسته د انفرادي کاتا په برخه کې هم د برونزو مډال ګټلی دی.
دا سیالۍ په لویو سیالیو کې د ګډون لپاره د ورزشکارانو چمتووالي او ارزونې په موخه ترسره شوې وې.
د یادونې ده چې دغه افغان لوبغاړی اوس په فرانسه کې ژوند کوي.
هغه هيله لري چې د کراټې نړيوالو سياليو کې په ګډون سره د خپل هېواد لپاره لا زيات ویاړونه ترلاسه کړي.
