۸صبح، کابل: د افغانستان کرېکټ بورډ ویلي چې ملي لوبډله به د روان میلادي کال په جون میاشت کې له هند کرېکټ ملي لوبډلې سره د درېیو یو ورځنیو او یوې ټېسټ لوبې په موخه یاد هېواد ته سفر وکړي.
کرېکټ بورډ دوشنبه د کب پر ۱۱مه په یوې خبرپاڼې کې لیکلي چې د جون له شپږمې تر ۱۰مې به د پنجاب ایالت د موهالي اړوند په نوي چندیګړ لوبغالي کې د دواړو هېوادونو ترمنځ دا لوبلړۍ په ټېسټ لوبې پیل شي.
د خبرپاڼې له مخې، له ټېسټ وروسته به دواړه لوبډلې درې یو ورځنۍ سیالي هم وکړي.
ټاکل شوې چې لومړۍ لوبه د جون پر ۱۴مه په درمساله، دویمه د جون پر ۱۷مه په لکنو او درېیمه یو ورځنۍ نړیواله لوبه د همدې میاشتې پر ۲۰مه په چنای ښار کې وشي.
دا دویم وار دی چې افغان لوبډله له هند سره ټېسټ لوبه کوي او لومړی ځل دی چې افغان لوبډله د یو ورځنیو سیالیو په یوې بشپړه لوبلړۍ کې د سیالې هندۍ لوبډلې پر وړاندې د سیالۍ ډګر ته ښکته کېږي.
کرېکټ بورډ ویلي چې د افغانستان او هندوستان ترمنځ پر درېیو شل اوریزو سیالیو هم خبرې روانې دي چې ښايي د روان کال په اوږدو کې د افغانستان په کوربتوب وشي.
دا په داسې حال کې ده چې د روانې مارچ میاشتې پر ۱۳مه په متحده عرب اماراتو کې د افغانستان او سریلانکا ترمنځ د درېیو شل اوریزو او درېیو یو ورځنیو سیالیو لوبلړۍ هم پلان شوې ده.
