۸صبح، خوست: سیمهییزې سرچینې وايي چې په خوست کې د یوې ترافیکي پېښې په پایله کې درېیو کسانو ته مرګژوبله اوښتې ده.
سرچینو دوشنبه د لړم پر ۱۱مه ۸صبح ورځپاڼې ته وویل چې دا پېښه د اسماعیلخېلو مندوزیو ولسوالۍ اړوند په «سموات» کلي کې شوې ده.
د سرچینو په خبره، په پېښه کې یو کس مړ شوی او دوه نور ټپيان دي.
ویل کېږي چې د پېښې ټپيان د خوست روغتون ته وړل شوي دي.
په خوست کې د طالبانو امنیې قوماندانۍ هم د دې پېښې پخلی کړی دی.
ترافیکي قوانینو ته نه پاملرنه، د چلوونکو بې احتیاطي، چټک مزل او د سړکونو خرابوالی په افغانستان کې د ډېرو ترافیکي پېښو لاملونه ګڼل کېږي.
