۸صبح، کابل: د راپورونو له مخې، افغان کډوال له پولنډ څخه تر ایستل کېدو وروسته افغانستان ته د خوندیتوب له تضمین پرته لېږدول کېږي.
پولنډي رسنیو سهشنبه د چنګاښ پر ۲۳مه راپور ورکړی چې له دغه هېواده د افغان کډوالو ایستل په جلا توګه او د هرې قضیې لپاره تنظیمېږي او د پولنډ سرحدي ګارډ د دغه بهیر د همغږۍ لپاره د طالبانو پر محدودو تماسونو تکیه دي.
د راپور له مخې، د پولنډ سرحدي ګارډ یوازې په تخنیکي کچه په افغانستان کې له طالب استازو سره اړیکه لري، څو هغه کسان بېرته ولېږدوي چې د دغه هېواد د پرېښودو امر یې ترلاسه کړی دی.
راپور د اپریل پر ۱۰مه د ایستلو عملیاتو ته اشاره کړې چې پکې درې افغان کډوال، که څه هم د اروپا د بشري حقونو محکمې یې د لنډمهاله خوندیتوب تدابیر صادر کړي و، له پولنډه وایستل شول.
د پولنډ سرحدي ګارډ هم خبر ورکړی و چې د افغانانو په ګډون یې ۷۱ کډوال له لیتوانیا او بلاروس سره د دغه هېواد پر پوله نیولي دي.
دا په داسې حال کې ده چې په دې وروستیو کې په اروپايي هېوادونو کې افغان کډوال د جبري ایستلو په ګډون له ګڼو ننګونو سره مخ دي.
له دې مخکې د اروپايي پارلمان غړې هانا نیومن ویلي و چې افغانستان ته د کډوالو ایستل یوازې بشري ماتې نه، بلکې ستراتېژيکه تېروتنه ده.
