۸صبح، کابل: د افغانستان د اعراضکوونکو ښځو خودجوشه غورځنګ د یوې اعلامیې په خپرولو د طالبانو د ښوونیز نصاب په هکله د ۸صبح ورځپاڼې د موندنو په تړاو غبرګون ښودلی دی.
د دغې اعلامیې د معلوماتو له مخې، چې یکشنبه د لیندۍ پر ۲۷ خپره شوې ده هېواد کې د جمهوریت دورې ښوونیز نظام له دیني لارښوونو سره په هره موضوع کې له تضاد پرته ګڼل شوی دی.
د اعتراضکوونکو ښځو خودجوشه غورځنګ د هېواد په ښوونیز نظام کې د طالبانو له خوا راوستل شوي بدلونونه د نه منلو بللي دي.
دغه غورځنګ ویلي، چې افغانستان یوازې ملا او مولوي ته نه بلکې په نورو برخو کې هم متخصصانو ته اړتیا لري.
د افغانستان د خودجوشه غورځنګ په اعلامیه کې ویل شوي، چې راوستل شوي بدلونونه د دې ډلې د افراطي نظریاتو ښکارندویي کوي.
د ویلو ده، چې ۸صبح ورځپاڼې د طالبانو د ښوونیز نصاب یوې نسخې ته لاس موندلې، چې په تېرو دوو کلونو کې برابر شوی او درې روزنیز مضمونونه یې له نصاب څخه ایستلي دي.
