۸صبح، کابل: په غربت کې د افغان ځوانانو ارکسټر او د موسیقۍ ملي انسټيټوټ په پروان او لغمان کې د طالبانو له خوا د موسیقۍ څه باندې ۵۰۰ الو سوځول غندلي دي.
د ځوانانو ارکسټر او د موسیقۍ ملي انسټيټوټ چهارشنبه د سلواغې پر ۲۹مه په یوې اعلامیې کې ویلي چې د طالبانو دا ګام د افغانانو له کلتور سره ښکاره دوښمني ده.
د یادو بنسټونو په خبره، طالبان د موسیقۍ الو په سوځولو غواړي د افغانستان د خلکو کلتوري هویت او هنري میراث له منځه یوسي.
په اعلامیې کې راغلي: «موسیقي د تاریخ په اوږدو کې د افغانانو د ټولنیز او کلتوري ژوند یوه نه جلا کېدونکې برخه وه او په یووالي، د ارزښتونو په لیږد او کلتوري تنوع کې یې مهم رول لوبولی دی.»
په اعلامیې کې ټینګار شوی چې طالبانو میلیونونو کسان له خپلو بنسټيزو کلتوري او هنري حقونو څخه محروم کړي دي.
د افغان ځوانانو ارکسټر او د موسیقۍ ملي انسټیټیوټ د نړیوالې ټولنې له کلتوري ادارو څخه غوښتي چې د طالبانو د دغو کړنو په اړه چوپ پاتې نه شي.
پر افغانستان د طالبانو له واکمنېدو وروسته پر موسیقۍ بندیز لګېدلی او په بېلابېلو ولایتونو کې یې د موسیقۍ سلګونه الې سوځولې دي.
